.
السلام عليكم ورحمة الله وبركاته
,
وعدتكم اني اجمع اغراض الطفل اللي ناسبتني وحبيتها في بوست واحد عشان تكون اسهل للجميع
وطبعا الاغراض والعدد يختلف من وحدة للثانية , واللي يناسبني ممكن مايناسبك
لكن جميع اللي راح اعرضه فعلا استفدت منها وماكانت تجميع على الفاضي
,
في البدايه راح اتكلم عن احتياجات الطفل من الملابس في فترة الاربعين ...
اولا فنايل داخليه وبربتوزات وكلهم من نكست ، لانه افضل الموجود وقطنهم حلو ومايتأثر باللبس والغسيل ، مهادات خفيفة من سنتر بوينت .. وللاسف مااستخدمتهم كثير لان فيصل ماكان يحب يتمهد وتركته على راحته لاني مو مقتنعه ان المهاد له فايده ، فوط صغيره من مذركير للرضاعه وبعدها وقت التتغير ، قبعات خفيفة قطنية .. وكمان نكست هو الافضل مقاسهم مضبوط , ولاني قريت ان الافضل نغطي راس الرضيع لانه يفقد الحراره ويكتسب البرودة من راسه وطبعا القبعات لازم تنشال وقت النوم
، وبالاخير قلفزات لليدين مع ان اغلب البربتوزات الحين لها تسكيره من اليد فممكن نستغني عنهم ،
واخر شي واللي فعلا فادني كثير هي القطع الصغيره اللي تحت يسار .. كنت افرشها بالسرير تحسبا لاي تسريب وكنت احطها على المخدة عشان لو طلع حليب
,
اغراض الشاور والتغيير
طبعا بامبرز وفازلين واكياس لرمي البامبرز المستخدم اجيبها معطرة ومن مذركير
انا عن نفسي استخدم بفترة الاربعين القطن والموية للتنظيف , انظف للطفل من المناديل المبلله واريح بالنسبة لي من المغسلة ،
اعواد تنظيف للاذن ( طبعا تنظيف خارجي فقط ، ولتنظيف السره بشكل لطيف ) و ليفه ناعمه .. تحصلون هالاغراض باكثر من مكان لكن انا ارتاح لمنتجات لمذركير
، مجموعة الشاور ( وهنا يحدث الاختلاف الكبير والصراع بين الامهات ) ! انا بصراحة افضل ريحة جونسون واستخدمها ،
وبنفس الوقت استخدم سيباميد لانه طبي وماله ريحة وخفيف على بشرتهم
حاجة مهمه ، شايفين الفوط الصغيره يمين الصوره فوق ؟ كنت استخدمها لتنظيف الرقبه وبين الاصابع تجي مجموعة ملونه مع بعض عند مذركير
وباقي شي مره مفيد ومستحيل استغني عنه اول الايام .. اللي هو مفارش قطن وتحتها بلاستك ( للاسف مالها صوره عندي ) لكن موجودة بالصيدليات وهي نفسها اللي يحطونها على اسرة المرضى بالمستشفيات
فكرتها قبل كل تغيير افرشها على طاولة التغيير تحسبا لاي حوادث وبعد كم استخدام ارميها واستخدم جديدة
بخصوص وقت الشاور
.. في البداية كنت استخدم الاسفنجة واحطها داخل البانيو الازرق، لانه كان صغير وكنت اخاف يزلق من يديني وبعدها بشهرين بديت استخدم له الكرسي
وبصراحة اريح وانظف بكثير
اولا البيبي يثبت فيه، وخفيف مره ويتسفط وماياخذ مكان ، وينشف من الموية بسرعه
بعكس الاسفنجة اللي كانت تجلس وقت طويل عشان تجف !! وكنت ابدلها باستمرار لان بالرطوبه تتكاثر الجراثيم ف الافضل الكرسي
ولغرفة البيبي او الحمام او اي مكان يكون عند طاولة التغيير كنت ولازلت استخدم هالزباله من
munchkin
واللي اعبرها حاجة مهمه بالنسبه لي ومااقدر استغني عنها (ولو ان فيه كثير يشكون منها ومن ريحتها) للامانه انا اوقات قليله جدا اللي اشكي من ريحتها والسبب يكون ان مادة الصوديوم اللي على بابها يحتاج للتغيير! ومن عيوب هالزباله ان اكياسها بصعوبه تتوفر
ف يحتاج منك تطلبينها اون لاين او تاخذين كمية كبيره في حال توفرت
... جميع هالاغراض متوفره عند مذركير
,
ونجي الحين للرضاعات وغسليها
في البداية كنت على رضاعات تومي ( موجودة في ماماز اند باباز ) لاني وقتها كنت استخدم جهاز تومي للشفط
، بصراحة انصح فيه وبقوة
وتحصلونه كمان عند ماماز
بالنسبة للصابون اللي اغسل فيه ... هو من ( بيجون ) و موجود باغلب الصيدليات وكمان بسنتر بوينت
اما عن جهاز التعقيم ... كنت استخدم جهاز افنت وللاسف طلع مثل الاملاح او الصدا وماقدرت ازيله
!! مع اني كنت استخدم مياه معبئة !! فاضطريت ابدله بجهار مذركير للتعقيم
وللان ماشاء الله نظيف ومافيه اي ترسبات
الحاجة المهمه واللي اختصرت علي وقت هي جهاز التسخين من افنت
احط الرضاعه فيها واشغلها ( مع مويه طبعا ) .. دقايق والرضعه دافيه
بلا موية مغلية بلا مشاوير
والحاجة اللي مو مره استفدت منها هي القطعه الي نعلق عليها الرضاعات عشان تنشف ! بصراحة ماكان لها داعي ابد !! لاني كنت اغسل الرضاعات واحطهم بجهاز التعقيم وبعدها ع الثلاجة
اما بخصوص المصاصات
ف انا جربت اكثر من ست انواع وشركات وبالاخير ماتقبل الا افنت
ولاحظت ان كثير مواليد مايمسكون الا هي
فاختصروا المشوار وجربوا افنت في البداية
طبعا موضوع المصاصة فيه اختلاف كبير بين الامهات
وكل وحده تسوي اللي يريحها
,
غسيل الملابس
،، طبعا لازم كل الملابس والمفارش تتغسل قبل يلبسها البيبي ! وانا افضل الغسيل اليدوي للملابس .. انعم
! اما بخصوص الصابون ، فهذا من افضل الانواع الموجودة
متوفره منه سايل وبودرة ( انا اميل السايل ) ... خفيف ماله ريحة ولطيف على بشرة الاطفال
وانصح فيه وبقوة ! وكم وحده كانت تعاني من حساسية ببشرة ولدها وبعد مانصحتها بهالصابون اختفت بعد امر الله
الصابون ماهو متوفر باستمرار للاسف
تلقونه في التميمي والدانوب بحدود ال ٨٥ ريال
,
.. غسول الرضاعات واغراض البيبي من العاب ومستلزمات اكل
صابون بيجون تحصلونه باغلب الصيدليات وكمان بسنتر بوينت ، الفرشة الخضرا روعه
تعبينها من الصابون وتضغطين ويطلع لك .. تحصلونها بمذركير وسنتر بوينت وفيه منها الوان
بعد عميلة الغسيل عندك اكثر من خيار ..
يا تغلينهم بموية ع النار لمدة خمس دقايق يا تحطينهم بجهاز التعقيم يا تستخدمين كبسولات التعقيم
هذا والله اعلم
,
,
